樓宇解碼：懸棺露台係邊個發明？ - 彼德．算星辰

又要發水又要守規矩. 呢份聯合作業備考喺2002年首次推出，當時嘅要求比較少，例如每個住宅單位嘅工作平台最大豁免面積 ... Skiptothecontent 首頁 算星辰是甚麼？ 文章分類 懶人的投資 生產力 姓名學一學 日月星尋 十分鐘書房 風水鑑證科 樓宇解碼 占卜 賽馬六合彩 資訊保安 環球金融 彼德．算星辰 Close 首頁 算星辰是甚麼？ 文章分類 懶人的投資 生產力 姓名學一學 日月星尋 十分鐘書房 風水鑑證科 樓宇解碼 占卜 賽馬六合彩 資訊保安 環球金融 搜尋關鍵字: ©2022彼德．算星辰. PoweredbyWordPress. ThemebyAndersNorén. 開講有話衣食住行，但住屋竟然只係排第三位，呢個說法肯定唔係香港人所創。

喺呢個城市，住屋首先係商品，其次先至係必需品。

因為賣樓實在太好搵，地產發展商都盡力壓低成本，好唔好住都係其次，最緊要賺到笑。

所以，依家啲樓只求本小利大，根本唔係為居住而設計，搞到越起越騎呢。

懸棺露台 其中一個近年最流行嘅騎呢設計，就係懸棺露台。

懸棺並非新鮮事物。

中國南方有啲少數民族，喺懸崖上打入木柱，用來架起棺木。

喺懸崖下面向上望，一副副棺材半天吊，何其壯觀。

（百度百科圖片） 好多住宅單位都有露台。

本來露台係一件好事，一般情況下都唔會聯想到棺材。

弊就弊在依家啲露台起到又長又窄，喺個單位度伸出去，望落好似少數民族啲懸棺，只係更為壯觀。

於是，大家就戲稱呢啲露台為「懸棺露台」。

（蘋果日報圖片） 工作平台 其實，呢啲「露台」嘅學名唔係「露台」，而係「工作平台」。

根據屋宇署、地政總署及規劃署嘅聯合作業備考，工作平台係「推廣建造環保及創新的樓宇」嘅鼓勵措施，俾住戶一個地方晾衫，唔洗喺窗台裝條橫通用嚟掛衫，或者喺本來已經好細嘅屋企放多一部乾衣機。

但係，政府要「鼓勵」發展商提供呢樣「環保及創新設施」，就梗係要俾啲甜頭。

呢份聯合作業備考，就寫明呢啲設施可以豁免計入總樓面面積。

按《建築物條例》、《城市規劃條例》以及政府地契，每一塊地都有可建總樓面面積嘅上限。

假設發展商用某個價錢買入某塊地，而呢塊地只限起三十萬呎樓面面積。

因為工作平台可以豁免計入總樓面面積，發展商就可以降低每呎成本。

同時，工作平台豁免咗部份面積，但又可以照樣賣俾買家。

賺還賺，點解啲工作平台要起到又長又窄，伸出去成副懸棺咁呢？原來，以前嘅工作平台，並唔係咁嘅。

又要發水又要守規矩 呢份聯合作業備考喺2002年首次推出，當時嘅要求比較少，例如每個住宅單位嘅工作平台最大豁免面積不可超過1.5平方米（即大約16平方呎）。

當時嘅規定，工作平台可以同環保露台合併。

於是，嗰幾年落成嘅住宅單位，大部份都有呢種工作平台加露台二合一嘅環保設施。

因為兩者合併咗，加埋嘅面積比較大，唔會好核突。

（工作平台與露台合併的例子） 但係好景不常，到咗2006年政府修改聯合作業備考，工作平台不可與同一單位內的任何露台相連。

到咗2011年，政府再加辣，工作平台要同露台相隔最少1.5米。

而且，係成個工作平台最小要有1.5平方米咁大先至有資格獲得豁免，但係最大豁免面積又改為工作平台面積嘅50%（但上限為0.75平方米）。

即係話，發展商要攞到最大豁免面積，就只能夠起個1.5平方米嘅工作平台，再大啲嘅都唔會有更多豁免面積。

於是近年新盤嘅工作平台，全部都唔可以同露台拍住上，加上「最有效攞盡豁免」嘅面積只有16平方呎，個設計好容易就會變成又長又窄。

（工作平台與露台分開） 明白以上所講，就會知道政府雖然無份設計懸棺露台，但成樣嘢嘅始作俑者根本就係佢。

之但係，政府咁做又未必錯晒，因為呢啲環保及創新設施好容易被濫用嚟起發水樓。

當年屋宇署署長梁展文事件，其中一個爭論點，就係佢在位時推出呢啲環保及創新設施政策，令發展商可以賺到盡。

呢件事之後政府先至做諮詢，於是到2011年就收緊政策。

以後大家買入單位時，見到個又長又窄又唔實用嘅懸棺露台，除咗感嘆設計巧奪天工，記得同政府講聲多謝喇。

分享此文：FacebookTwitterPinterestPocket 相關 134月日,2017 In樓宇解碼 住宅奇則工作平台建築懸棺露台樓宇樓宇設計露台 ←Previouspost Nextpost→ 發佈留言取消回覆發佈留言必須填寫的電子郵件地址不會公開。

必填欄位標示為*留言*顯示名稱* 電子郵件地址* 個人網站網址 用電子郵件通知我後續的迴響。

新文章使用電子郵件通知我。

Δ